Tong-Its

Laro. Libangan. Bisyo. Laban.

Dati ko nang alam ang tong-its. Hindi ko na nga matandaan kung pa’no ko ito natutunan. Ngunit dahil matagal na halos ito ay aking nakalimutan. Kaya kailangan ko ng refresher course bago muli akong maglaro. Muling aralin ano ba ang mga moves na dapat at diskarte para mabuo ang mga baraha.

Laro. Nakakatutuwa, nakakalibang, magandang pampalipas ng oras. Bonding sa barkada. At ehersisyo rin sa kamay. Mainam din na gawain para maging matalas magbilang. Mind game at diskarteng swabe.

Libangan. Nakakaaliw na pwedeng maging katuwaan. May nakataya bang piso o tatanungin ng nosebleed na tanong ang talo? O kantyaw lang sa talunan sapat na. O kaya naman di ka kasali sa sunod na hatian ng baraha.

Bisyo. Kung kalabisan na at nakasasama. Kung may diskarteng madaya at panlilinlang. Kapag ito ay naging natatanging paraan at dahilan ng mga bagay bagay. Marahil hindi na ito maganda—kailangang aralin na kung paano lumaya sa hiwaga ng baraha.

Laban. Oo nga naman sa hatian pa lang ng baraha nagnanais na mahawakan ang magandang kumbinasyon. Swerte nga ba o diskarte? Ano man ang dahilan at paraan patas kang lumaban. Nasa bandang huli tatawa at mag sasabi ng “tong-its” o kaya naman maging mapagmatyag na kung imposible na lumamang ka na lang sa bilangan. Basta hanggang huli tuloy mo ang laban.

Ang tong-its parang pag-ibig. Laro. Libangan. Bisyo. Laban. Kung ano ang makabubuti at tunay patuloy na panghawakan. Gaano man ito nag bibigay ng ligaya ito ay higit at mas makahulugan sa laro at libangan. Kung sobra na ito marahil ay bisyo na dapat nang pakawalan. Matalo ka man o manalo huwag kang susuko hanggang hindi pa tapos ang laban. Gaya ng pag-ibig gaano ka man kagaling minsan hindi pa rin dahilan upang mapanalunan ang bawat laban. Ang puso gaya ng baraha may kakaibang hiwaga at mahika.

Ano ang kwentong tong-its mo?

Relapse

Akala mo okey ka na. Buo na ang desisyon mo. Okey lang na wala na. Nakamit mo na ang grasya matapos ang mahabang dasalan. Tuyo na ang panyo paglipas ng maraming beses na pag hugas ng mata sa walang katapusang pag buhos ng luha. Yun ang akala mo…hanggang sa--

Relapse.
Natatangi o isa sa maraming “stop over” sa proseso o mahalagang kwento sa buhay ng tao. Siguro ang relapse ay isang paalala na meron ka prosesong pinagdaraanan, pakikibakang ninanais panalunan o bahagi ng paglalakbay na nais nang lampasan.

O pwede din marahil na maging dahilan upang--

♥ Maghintay sa nakasanayang pagtawag niya sa telepono
♥ Gamiting muli ang dating number baka sakaling may mag text
♥ Muling maramdaman at sabihing gaya ng dati “ikaw pa rin”
♥ Palayain at sabihin ang katotohan sa puso na-- mahal mo pa rin (dahil first love o true love)
♥ Balikan ang nadamang pait at hapdi sa dibdib nang wala na sya
♥ O kaya muling umasa na baka maulit pa o baka naman may magbago

Ang mga masidhi bang pakiramdam at pagnanais sa relapse--

♥ Ay sadyang bang pagsubok kung talagang okey ka na at kaya mo nang pangatawanan ang mga desisyong pinag tibay ng maraming dasal. Kaya nang yakapin ang mga realizations na maraming beses mong iniyakan. At muling subukan ang tatag ng damdamin at katapangan ng puso.
♥ Pwede din sigurong tingnan na ito ay regression matapos ang partial recovery, pero okey lang din yun kasi pansamantala lang naman (sana din ay tumagal) at patuloy pa rin ang gamutan hanggang sa tuluyang maghilom.
♥ Ito ay isa marahil na backslide after an apparent improvement… siguro para mas maging sensitibo at desidido na mag patuloy sa paghakbang papalayo gaano man kahirap sa puso.

Ano pa man ang kahulugan at pakiramdam mo sa relapse.. bahagi pa rin ito ng buhay gaya ng paghahangad, pagtataya at pananatili. Alam na ng puso ko at ng puso mo-- na bago lubusang magpalaya mahalaga na pag daanan ang importanteng paglalakbay -- ang relapse.